“Meta porositi vrasjen e vëllait të deputetit”, SPAK: Nuredin Dumani NUK ka dhënë asnjë dëshmi të tillë!

Prokuroria Speciale ka dalë me njoftim zyrtar për deklaratën e bërë mbrëmjen e djeshme nga gazetari Artan Hoxha, i cili i ftuar në një emision televiziv u shpreh se Nuredin Dumani kishte dëshmuar se Ilir Meta kishte porositur vrasjen e Aleksandër Ndokës.

Advertisements

Referuar njoftimit zyrtar, thuhet se “shtetasi nën hetim Nuredin Dumani, nuk ka deklaruar asnjë të dhënë në lidhje me Presidentin e Republikës së Shqipërisë.” Aleksandër Ndoka ishte vëllai i ish-deputetit të PS Arben Ndoka, dhe u ekzekutua në vitin 2017 në derën e shtëpisë.

NJOFTIM PËR SHTYP – Prokuroria Speciale SPAK

Advertisements

Në vijim të interesimit të shtuar të mediave, në lidhje me deklarimin e gazetarit Artan Hoxha për sa i përket të dhënave të pretenduara si të deklaruara nga shtetasi nën hetim N.D. për Presidentin e Republikës së Shqipërisë, të transmetuar në televizionin Kombëtar “Klan”, në emisionin “Opinion” të datës 02.06.2022, sqarojmë opinionin publik se:

Në deklarimet e dhëna në kuadër të procedimit penal nr.75/2022 që po heton Prokuroria e Posaçme, shtetasi nën hetim N.D., nuk ka deklaruar asnjë të dhënë në lidhje me Presidentin e Republikës së Shqipërisë.

Duke marrë shkas nga ky rast, si dhe duke mbajtur në konsideratë edhe trajtimet që i janë bërë deklarimeve të shtetasit N.D. në emisione të ndryshme televizive, ftojmë mediat që të jenë të kujdesshme, të mbajnë në konsideratë ndjeshmërinë e kësaj çështje, të respektojnë viktimat dhe familjarët e tyre, si dhe faktin se çështja është në fazën e hetimit paraprak dhe Gjykata e Posaçme e Shkallës së Parë Për Korrupsionin dhe Krimin e Organizuar referuar nenit 103 të Kodit të Procedurës Penale ka vendosur ndalimin e publikimit të vendimit nr.42 datë 17.05.2022 (me objekt caktimin e masave të sigurimit).

Artikulli paraprakShqipëria ‘pushtohet’ nga i nxehti afrikan, ja sa pritet të shkojnë temperaturat
Artikulli tjetërSPAK përgënjeshtroi deklaratën e tij, Artan Hoxha i përgjigjet menjëherë: Po nxora dëshminë e Nuredin Dumanit, çfarë do thoni?!